Isen fyller elva
På Rem har isferda gjort at elva er fyllt opp med is, og elvevatnet må finne nye vegar. Det er 50 år sidan sist elva demdest opp slik som no.
16. januar 2003
Ingrun Myklebust
I morgontimane i går såg det stygt ut nedanfor husa på Rem. Ei høg isdemning midt i elva stoppa elvevatnet. Seinare på dagen byrja vatnet å sige ut, og høgda på demninga vart redusert, fortel Ingbjørn Rem. Ved 16-tida i går rann framleis elvevatnet i eit leie mellom elva og husa på Rem. Bardar på 1,5 meter med is står opp langs elvebreiddene. Store delar av elva er oppdemt, både nedanfor og ovanfor brua.
Ingbjørn Rem veit at ein liknande situasjon oppsto for om lag 50 år sidan. Då stoppa isen i brua. Problemet vart løyst ved at isen vart sprengd vekk. Det gjekk med glasruter i husa i denne redningsaksjonen.
Teknisk sektor si FDV-avdeling er varsla om situasjonen i elva på Rem og er i beredskap, opplyser leiar Elisabeth Mansfield. Ho har vore i kontakt med NVE og fått råd om tiltak dersom situasjonen skulle verte verre. Aktuelle tiltak å setje inn kan vere ved hjelp av gravemaskin å grave innover i demninga langs kantane for å få isen til å flyte. Heimevernet er varsla om det skulle verte bruk for sandsekkar, og FDV har fått låne pumper av Tafjord Kraft i beredskapen sin.
Avdelinga hadde fullt opp å gjere i går med å stime opp frosne sluk og stikkrenner i Åsen og på Sylte. Smeltevatnet har fleire stader funne nye vegar etter at bekkefar, renner og grunnen er frosen.

Ingbjørn Rem er usikker på korleis utviklinga vert i elva i dagane framover. Det er dårlege meldingar og meir nedbør i vente.