Skapte nytt av gammalt
Av gamle vekeblad, lim og saks kan det bli kunst. Det fekk elevar ved Valldal skule sjå under vandreutstillinga som Gisle Harr har laga. Etterpå fekk ein del elevar sjansen til å gjere det same.
29. januar 2003
Ingrun Myklebust
Biletkunstnar Paolo Manfredi leia elevane gjennom prosjektet der ein skulle lage tredimensjonalt av todimensjonalt.
Saman med elevar og lærar for sjuande klasse onsdag, var kunstnar Paolo Manfredi.
Han jobbar vanlegvis som biletkunstnar på Tingvoll, men i vår reiser han rundt på skular med oppdrag frå statlege Riksutstillinger. Prosjektet som vitja Valldal og som sysselsette fjerde og sjuande klasse i to dagar, vert kalla «Kart og geografi - Hoppalong!»
Sjuande klasse jobba hardt med å klippe og lime svarte boksar som skulle romme tre-dimensjonale bilete med belysning. Dei fekk hjelp av lærar og kunstnar Paolo Manfredi. Som materiale klipte elevane ut todimensjonale bilete frå blad og postkort. Dei hadde modellar å sjå etter; kunstnaren Gisle Harr sine tredimensjonale boksar stod utstilte i musikkrommet.
Det blei ein hektisk dag for å få ferdig alle boksane. Etterpå har kunstnar Paolo tid til å forklare litt omkring prosjektet:
- Kva vil ein oppnå med å la elevane utføre denne type oppgåver?
- Ein gjenspeglar vår verd i stor grad, vi er så samansette. Dette er kanskje ein nykel for å forstå vår tid. Det krev at elevane må setje seg inn i ting, gå gjennom bileta og nytte brukt materiale for å skape noko nytt. Dei må bestemme kva som kan brukast og kva som skal vrakast.

Paolo Manfredi trur også det kan ha noko med perspektiv å gjere:
- Ein kan bruke eit fjell frå Norge og eit tempel frå India, det som bitt dei to saman er ikkje geografien, men perspektivet og lyset.
Han legg til at elevane får lære korleis dei skal skape tredimensjonalt av todimensjonalt.
Opplegget passar bra for mellomtrinnet, tykkjer Manfredi, men han har også hatt gode erfaringar med småsteget på andre skula

- Korleis er det å jobbe med elevar?
- Det er fint å jobbe med dei når dei er engasjerte. Barn er morosame skapningar! svarar kunstnaren.
Ein del av arbeida til elevane skal med i utstillinga til Ungdommens kulturmønstring.