Diskuterte neste trekk
Norddal kommunestyre måndag gjere vurderingar om kva brikker som skulle flyttast først for å få til ei god opning i det som etter kvart utviklar seg til å bli spelet om Murigrandane.
27. februar 2003
Ingrun Myklebust
- Vi har ikkje pengar til dette! Vi har brukt dei opp, ofte mot mi stemme, sa ein oppbrakt Martin Nystad (SV) som sluttreplikk på talarstolen måndag. Kommunestyret hadde diskutert korleis ein skulle leggje til rette for investorar på Murigrandane, på same tid som ein fann ei løysing for FDV, uteseksjonen i kommunen.
Investorane
Nøkkelpersonar for dei ulike prosjekta som planlegg etablering på Murigrandane var inviterte til å informere om desse. Ragnar Lødøen representerte både det planlagde spahotellet og helsehuset. For hotellet vil investoren framleis ikkje stå fram offentleg, men investoren for helsehuset er Karlsson Eiendom i Måløy. Firmaet kan vere interessert i å huse både næringshage og bibliotek i tillegg til helsedelen, opplyste Lødøen.
Etter denne opplysninga var det fleire av politikarane som såg mulegheita av å kunne unngå investeringar i samband med lokale til næringshagen.
På kapitaljakt
Representantane var einige i at det må leggjast til rette for helsebygg i samband med Muritunet, for spahotell og næringshage. Sidan spahotellet er planlagt bygt ved elva der Hove-bygget står, må dette flyttast. Flyttinga til Djupøyna er kalkulert til i underkant av 8 millionar kroner, inkludert tilrettelegging og gjenoppbygging der. Petter Melchior (Sp) trudde at desse kostnadene fort vil kome opp i 10 millionar kroner, og tek ein med dei naudsynte løyvingane til Galerie Tafjord, kan behovet for investeringskapital ende på til saman 15 millionar kroner, pengar den gjeldstynga kommunen ikkje har. Melchior stilte spørsmålet om ein no var villig til å opne kista og bruke elverk-aksjar eller Tafjord Kraft-aksjar.
Svein Linge (Ap) meinte det ville vere svært politisk uetisk å starte diskusjon om sal av TK-aksjar no like før valet. Han viste til at ordføraren nyleg hadde sagt det var uklokt å selje aksjane, og at inntektene frå aksjane no er store. Han stilte spørsmål ved om det er naudsynt å byggje ut veg, vatn og kloakk i Djupøyna, når det allereie er eit bygg i området.
Martin Nystad kom med forslag om å danne eit eigedomsselskap som kunne ta seg av oppgåvene med flytting og bygging. Han stilte også spørsmål om kor stort ansvar Norddal kommune har for å drive installasjonsfirma og butikk som sel elektriske artiklar.
Signe Brenna (V) sa Norddal Elverk er ei viktig bedrift med viktige arbeidsplassar. Ho såg ikkje poenget med å selje ut arbeidsplassar med ei hand og byggje nye med den andre handa.
Brenna kom også med forslag om at næringshage-styret, der dei fleste nøkkelpersonane er representerte, kunne førebu saka for kommunestyret. Ordførar Arne Sandnes var av den oppfatning at administrasjonen måtte gjere dette arbeidet, og heller bruke styret som referansegruppe.
Konklusjonen på møtet vart at situasjonen til FDV må avklarast først, manglane i lokala dei er i, gjer at dei er pålagt dagbøter frå arbeidstilsynet frå 1. mars. Ordføraren såg for seg at neste kommunestyremøte må innehalde diskusjon om sal av TK-aksjar, sidan kommunen per i dag ikkje har midlar til reguleringane og investeringane som trengst. Han ville også sjå nærare på om skiping av eit eigedomsselskap kunne vere ei løysing.