Direktevalet heng i ein tråd
Venstre tek initiativ til ei tverrpolitisk liste. Det er usikkert om det vert meir enn ein ordførarkandidat.
6. mars 2003
Ingrun Myklebust
Stemninga i fleire av partia er avventande. Somme har høyrt snakk om bygdelister og tverrpolitiske lister, men få veit noko sikkert. Senterpartiet er dei som har kome lengst i prosessen, dei har Arne Sandnes som ordførarkandidat, og medlemmane har fått listeforslaget ut til høyring.
Folk med bakgrunn i Venstre annonserer i dagens avis med tanke på å få til ei tverrpolitisk liste for heile Norddal.
Arbeidarpartiet har som mål å stille med ordførarkandidat, men skal også ta stilling til den tverrpolitiske rørsla på årsmøtet i dag.
31. mars må partia ha listene til valet klare.
Arbeiderpartiet
Formann i Norddal Arbeidarparti, Kjell Arne Valdal, seier partiet ikkje har problem med å få til liste til haustens val. Ap skal ha årsmøte i kveld, og ei av sakene vert korleis dei skal stille seg til førespurnader om å vere med i ei tverrpolitisk liste. Valdal seier at for sin eigen del er ei bygdeliste heilt uaktuelt, det vil vere å setje partiet eit stort steg tilbake.
For nominasjonsnemnda er det eit mål at partiet skal stille med ordførarkandidat. Dette skal også opp som sak på årsmøtet.
Det Kjell Arne Valdal kan seie med sikkerheit, er at det ikkje vert noka nedlegging av partiet, som har jobba seg opp til å ha fire representantar i kommune-
styret.
Senterpartiet
- Vi har fått til liste som vi har sendt ut til medlemmane og som dei skal få seie sitt til, opplyser leiar for valnemnda i Sp, Per Magnus Berdal. Noverande ordførar Arne Sandnes er valnemnda sin kandidat til direkte val på ordførar, og han har sagt ja til å stille på lista. Partiet si liste vert endeleg vedteken etter nominasjonsmøtet 17. mars, då først vil det endelege forslaget ligge føre.
Venstre
Talskvinne for Venstre, Unn Linge Valdal, seier at det ikkje blir noko rein venstreliste til dette valet. Partiet har hatt to opne møte i det siste, med lita oppslutning. Linge Valdal seier situasjonen er den same for mange småparti i fleire kommunar.
Venstregruppa tek initiativ til eit møte torsdag der ein vil prøve å få til ei tverrpolitisk liste. Kommunestyrerepresentant Sigene Brenna seier denne prosessen skal vere mest muleg open, og at målet er å få med ei liste for heile kommunen samla. I Norddal kommune skal det 30 underskrifter til for å skape eit nytt parti.
Høgre
Karl Jostein Rødset har vore Høgre sin representant i kommunestyret siste perioden. Han stiller truleg ein periode til, men er ikkje endeleg bestemt. Han seier tvilen har med samansetjinga av kommunestyret å gjere. Overvekta som Sp og KrF har om dei står samla, gjer at det er vanskeleg for dei andre partia å få fleirtal i saker.
Rødset seier det er mykje spennande på gang i Norddal no, og dette gjer at lysta til å stille i ein periode til aukar.
- Eg håper Høgre klarer å stille liste, og eg vil gjere det eg kan for å få det til, seier Karl Jostein Rødset. Han har høyrt snakk om ei tverrpolitisk liste og kan som eit alternativ tenkje seg å stille her, dersom hans eige parti får problem med rekrutteringa, og dersom han får ein sikker plass på ei slik liste.
Høgre skal snart ha årsmøte og her vil det bli avgjort om partiet kan stille liste til hausten, og om det blir aktuelt å lansere ein ordførarkandidat. Det siste har Rødset lite tru på, sidan partiet er så lite.
Sosialistisk Venstreparti
SV stiller liste også til neste val, og leiar Martin Nystad seier at sjølv om dei har nok folk, er det framleis ledige plassar til gode kandidatar. Han seier partigruppa synest det er bruk for SV, og dei er oppmuntra av høge meiningsmålingar sentralt.
Martin Nystad har høyrt snakk om ei tverrpolitisk liste og trur dei fleste partia med unntak av Sp lurer litt på det politiske terrenget for tida. Sjølv synest han det er mest rett å stille liste for partiet, men er ikkje uvillig til å vere med på sonderingar saman med andre parti.
Partiet har ikkje vurdert om dei vil stille med ordførarkandidat. Nystad seier at dersom nokon har lyst å fronte SV-politikk, er dei opne for ein ordførarkandidat. Han trur ikkje det er så mange å ta av.
- Det er ein tøff jobb å vere ordførar og det er ikkje alle som kan stille til det vervet. Det må vere nokon som har lyst og som har tillit, seier Martin Nystad.
Han skildrar elles situasjonen i lokalpolitikken som tung som ei følgje av kravet om nedskjeringar. Han tykkjer det er mange gode forslag til styring som heile tida vert nedstemt av fleirtalet. Det er heller ikkje lett at sentrale styresmakter gjer det vanskeleg for kommunane å drive velferdspolitikk. Han opplever at han som lokalpolitikar ofte får kjeft for ting som kommunepolitikarar ikkje har kontroll over i det heile.
Framstegspartiet
Leiar i Frp, Idar Rønneberg, seier partiet er klar med ei liste. I år står han sjølv øverst på lista, Eva Kaldhusseter som toppa lista ved forrige val, er flytta. Magne Almstad som er partiet sin representant i kommunestyret, står på lista også i år.
Partiet stiller ikkje med ordførarkandidat. Rønneberg har ikkje høyrt om bygdelister eller tverrpolitiske lister. Han meiner valet blir forutsigbart, og bygdelista på nordsida, som Sp vert kalla, ser han som ein klar vinnar.
Kristeleg Folkeparti
Leiar i valnemnda, Gunvor Sirevåg, seier at partiet håper å få til ei eiga liste. Oddfrid Tafjord har nyleg gitt beskjed om at ho kan stille, og då trur Sirevåg at sjansane for eiga liste er til stades. Valnemnda har enno ikkje teke stilling til om partiet skal stille med ordførarkandidat.