Planar for kaffi og bar
Mange stordalingar saknar ein stad å møtest for å ta ein prat eller ein matbit. Men snart skal saknet stillast: I lokala til Øie Centrum er det planar om pub og kaffibar. Initiativtakarane vonar det vert ein folkepub, med aksjane spreidde over heile kommunen.
26. mars 2003
Kenneth Strømsøy
Det er planar for ein pub og kaffibar i lokala til Øie Centrum.
Om ein ser etter ein god plass å nyte ein sterk kaffi og prate om vêr eller næringsutvikling, krig eller bleieskift, eller rett og slett om kaffi, finst det neppe lokale i Stordal som er meir eigna enn Øie-lokala overfor handelslaget. Lokala er opne og lyse og ligg i første høgda, så ein kjem seg inn både med barnevogn, rullator og rullestol. Og nett her er det no planar om kafé, pub og kaffibar.

Folkepub

– Vi er mange som meiner Stordal treng ein stad å møtest for å prate eller for å ta ein matbit eller kaffikopp, seier Vigdis Hove Øie, som saman med Paul Harald og Egil Arne Øie er initiativtakarar til kaffibaren.
– Det beste vil vere om dette vert ein folkepub, der aksjane i eigarselskapet vert spreidde over heile kommunen, held ho fram. – Vi som står bak ideen har ikkje ønskje om å eige nokon vesent-
leg del av selskapet.
Førebels er ideen ein smule laus, med tankar om servering av kaffi og kan hende noko sterkare drikk, saman med småretter som tapas, pizza, pasta og rundstykke. Initiativtakarane tenkjer seg at plassen kan verte dekorert med historiske bilete frå bygda, eller til dømes frå møbelbransjen, og at lokale musikarar og kunstnarar kan få ein stad å vise seg fram. Det viktigaste er at det vert ein plass der stordalingar kan kjenne seg heime og andre kan la seg lokke til å stoppe opp og ta turen innom.
Det første som må gjerast framover, er å stramme opp ideen, undersøkje kva stordalingane eigentleg ønskjer, og la ein arkitekt ta ein titt på lokala. Ein ventar at eit slikt forprosjekt vil koste kring 60.000 kroner. Ein del ombygging må uansett gjerast, mellom anna må dei enkle vindauga skiftast ut, og det må lydisolerast. Ikkje minst må det setjast opp eit lite kjøken.

Søkjer interesserte

– Det er ingen av oss som har tenkt å drive staden, så vi vil gjerne at dei som kan tenkje seg å drive ein kaffibar, tek kontakt med nokon av oss. Det gjeld anten dei er røynde i yrket eller rett og slett berre har brennande lyst og interesse for eit slikt arbeid, oppmodar Vigdis Hove Øie.