Startar rydding av Trollstigen
Etter at geologar frå vegvesenet har sett nærare på rasstaden frå helikopter, konkluderer dei med at rasfaren her ikkje er større enn andre stader i Trollstigen.
23. april 2003
Ingrun Myklebust
Ivar Hoel (t.v.) i Statens vegvesen har saman med geologar hatt synfaring i rasområdet frå helikopter. Den andre på bildet er Per Brandli. (Foto: Øystein Talberg, Åndalsnes Avis.)
Det var i førre veke at fleire tusen kubikk stein rasa ned på vegbana i Trollstigen. Ivar Hoel i Statens vegvesen seier om lag 50 blokker må sprengast for å få rydda vegen. Raset har gått over to vegstrekningar, og det er usikkert kor stor skade som har blitt gjort på asfalten. Først når dette er klart, kan ein seie kva oppryddinga vil koste. Hoel opplyser at det blir millionbeløp, noko meir sikkert er det for tidleg å seie.

Usikkert

Då representantar frå vegvesenet såg på rasstaden tysdag, viste det seg at det var sprekker oppe i fjellet som muleg kunne resultere i fleire ras. Det var usikkert korleis stabiliteten i lausneområdet var. Ivar Hoel meinte det var uvisst om ein kunne starte rydding av vegen, det måtte nye undersøkingar til. Onsdag drog tre geologar og anna mannskap frå vegvesenet opp i helikopter over rasstaden. Konklusjonen på synfaringa var at ryddearbeidet på vegen kunne starte. På spørsmål om han trur det vil gå fleire ras med det første, svarer Ivar Hoel at faren for dette ikkje er større her enn andre stader i Trollstigen.

Opnar til juni

Hoel seier mannskapa no skal prøve å finne ut kva maskiner som kan brukast i ryddearbeidet. Dei har som målsetjing å få vegen opna til 1. juni.
Ivar Hoel opplyser til Storfjordnytt at raset i Trollstigen som gjekk i førre veke er det største på 40 år. Det går vanlegvis ras i stigområdet om våren. I fjor gjekk eit mindre ras i same området. Det er frysing og tining om våren som utløyser dei nærast årvisse rasa.

Reiselivsnæringa roleg

Reiselivssjef Ove Skylstad seier han ikkje har vorte kontakta av reiselivsnæringa i Norddal om raset.
- Folk er nok spente. Det ein lurer på er om opninga vil skje 20. mai, eller om ein må vente til 1. juni. Skylstad fortel det var ein del henvendelsar på reiselivsmessa i Oslo om dette. Då kunne han fortelje turoperatørane at det låg an til ei tidleg opning. Med raset er denne situasjonen endra.
- Turoperatørane vil nok snart ringe for å få stadfesta kva tid Trollstigen opnar, seier Skylstad.