Gamlelensmannen rundar hundre

Det er tidleg på dag, og Ole Jakob Grønningsæter er allereie godt i gang med Sunnørsposten. Den spreke pensjonisten fylte 100 år i går.
7. mai 2003
Ingrun Myklebust
Ole Jakob Grønningsæter er fødd 6. mai 1903.
Han har av og til problem med å hugse ting, men elles er det ikkje så mykje som feilar den spreke hundreåringen. Han kan fortelje om at han var sjuk ein einaste gong, og det var like etter krigen.
No er den tidlegare lensmannsbetjenten pensjonær ved sjukeheimen i Valldal, her bur han saman med kona Bergliot. På spørsmål om han har det godt her, kjem det eit kontant ja. Han fortel at han prøver å følgje med ved å lese avisa, og dei som er rundt han kan fortelje at han les ho gjerne fleire gongar.

I kamp

Då Ole Jakob var 18 år, starta han på underoffisersskulen i Trondheim. Men det skulle ikkje bli militæret som han brukte mest tid på i åra framover, men lensmannsetaten. Etter skulen arbeidde han først nokre år som lensmannsdreng i Trondheim, før han fekk seg jobb i Ørskog og Sykkylven lensmannsdistrikt.
Første krigsdagane låg han i Romsdalen saman med andre norske soldatar og dei hadde kun gevær å hjelpe seg med i kampen mot tyskarane. Dei vart møtte med fly og bomber og måtte trekkje seg tilbake etter å ha innsett at dei ikkje hadde noko å stille opp med.

Lensmannen

Etter krigen kom Ole Jakob Grønningsæter med familien sin til Valldal. Tittelen hans denne gongen vart lensmannsbetjent i Dale. For folk i bygdene var han lensmannen, og han fekk respekt der han kom med sitt litt alvorlege og strenge oppsyn. Ikkje alle visste at det skjulte seg ein lun humorist bak det skarpe blikket. Han kan fortelje at han aldri kom ut for slåstkamp i tenesta si i norddalsbygdene. Andre fortel om lensmannen at han passa på å stoppe berre dei han visste var edru når det var kontroll.
- Han var kjend som ein snill lensmann, kan ein av pensjonærane på sjukeheimen fortelje.
Då svigerdotter Solveig spurde Ole Jakob kven han ville be i 100-årslaget svara han; alle jamaldringane. Det blir nok litt fleire enn det under feiringa til helga. I alle fall skal han få ein god middag og kake til, det var også blant ønska.