Vekst i Ørskog
Ørskog arbeidssamvirke har skifta namn og vorte til Vekst Ørskog. Verksemda gjev arbeid til menneske i vekst, og produserer ei rad ulike produkt og tenester av høg kvalitet.

14. januar 2004
Kenneth Strømsøy
Stordalingen Einar Stavdal stansar ut hòl i vindaugsventilane som Vekst Ørskog leverer til Spilka. Han vekslar mellom to ulike
maskiner, som gjer same arbeidet. Men den eine borar og bråkar, medan den andre stansar ut hòla og er langt meir stillegåande. – Eg likar å bruke begge maskinane. Det er ikkje vanskeleg. Eg lærte det med ein gong, seier Einar. Han fortel at han har vore i verksemda i fire år, og trivst godt. – Før jobba eg på Skodje. Eg har mange venner på Skodje. I dag skal eg spele fotball. På Skodje United. Det er trening i dag. I mai skal vi spele kamp, legg han til.
– Vi har aldri likt omgrepet «verna verksemd», som folk flest kallar slike verksemder
som oss. Det ligg mange feilaktige oppfatningar i dette omgrepet. For vi er ikkje verna: Vi konkurrerer både med andre verksemder av same slag og med private verksemder, og vi er avhengige av å levere gode produkt, i rett mengde til rett tid, opplyser dagleg leiar Ola Brautehaug ved Vekst Ørskog AS.
Brautehaug fortel at det er Arbeidssamvirkenes Landsforening, ASVO, som har valt å samle dei ulike medlemsverksemdene under namnet og logoen «Vekst». Vekst Ørskog er den andre verksemda i landet som stiller seg under Vekst-paraplyen, og den første som tek heile det nye marknadsførings-
programmet i bruk.

10-årsjubileum
Det gamle namnet til Vekst Ørskog var Ørskog arbeidssam-
virke. Denne verksemda vart etablert av Ørskog kommune for ti år sidan, då arbeidsstova
på Haukås forsvann med HVPU-reforma. Den første tida heldt samvirket til i Lied-bygget på Sjøholt, men med tida utvikla aktivitetane seg, og industriproduksjonen vart flytta til Sjøholtstrand. Her vert det i dag produsert ei rad produkt og tenester.
Brautehaug forklarer at det hadde vorte så store skilnader mellom produksjonen til Vekst Ørskog og aktivitetane på Øyra, at det ikkje lenger var tenleg å halde dei to saman i eitt selskap. Vekst Ørskog er ei verksemd som gir tilrettelagt arbeid til uføretrygda, samt utprøving og opplæring i nytt arbeid, medan Øyra aktivitetssenter gir aktivitetstilbod til heimebuande brukarar av kommunale omsorgstenester.

Møbelindustri
Den viktigaste delen av verksemda til Vekst Ørskog er møbelproduksjon: Verksemda produserer skjult treverk til fleire av møbelmodellane til Contract Møbler og Modi i Stordal. Sitwell-samarbeidet mellom Contract og Liabygda Møbelindustri har òg ført til at Vekst Ørskog har teke til å levere møbeldeler til Liabygda, fortel Brautehaug.
Ein annan viktig produksjon er vindaugsventilar. I fjor leverte arbeidssamvirket 110.000 ventilar til Spilka industri. Elles utfører verksemda transportoppdrag og tek imot elektronisk avfall. Men dei mest populære tenestene, i alle fall mellom vanlege storfjordingar, er nok montering av biletrammer og omtrekking og oppussing av gamle møblar.
– Det er full aktivitet her, og det einaste problemet er at vi treng meir arbeidskraft,
oppmodar Ola Brautehaug.

Øyra
Den opphavlege delen av Ørskog arbeidssamvirke, det som var framhaldet av arbeidsstova på Haukås, er no skilt ut som ei rein kommunal verksemd under namnet Øyra aktivitetsstove. Aktivitør Bente Strandman fortel at dei har 17 brukarar – 14 kvinner og tre menn – og kvar dag er det kring 15 som er innom. Sjølve aktivitetsstova er open kvar dag, og her vert det strikka, sydd og gjort anna handarbeid. Ikkje uventa er det berre kvinner som er her, og dei fleste kjem fire dagar i veka. Mennene har anna å gjere, og held til på treavdelinga, som er open tre dagar i veka. Tidlegare leverte dei ein del møbelkomponentar til arbeidssamvirket på Sjøholtstrand, men etter utskiljinga har tilbodet på treavdelinga vorte dårlegare.
I tillegg til strikke- og syarbeid vert det òg laga mat på aktivitetsstova. Privatfolk og verksemder kan tinge svele, kringle, gjærbakst eller ei enkel sjokolade- eller blautkake. Dessutan lagar brukarane felles lunsj kvar tysdag. Den største hendinga på aktivitetsstova er nok likevel julemessa, der ein kan få kjøpt alt mogleg nydeleg handarbeid for ein svært rimeleg penge. Handarbeidet er òg til sals elles i året, og er stilt ut i ein koseleg liten butikk inst i lokalet. Her fann bladfyken så mykje fint at han ikkje kunne halde seg frå å kjøpe overraskingsgåver til heile familien. Og alle vart glade!
Anne Karin Aasen har nytta aktivitetsstova i Ørskog sidan før stova vart flytt til Øyra for ti år sidan. Ho kjem utover fire dagar i veka for å strikke eller sy, eller for å lage svele. Dei som tingar svele frå aktivitetssenteret kan vere trygge på at det er Anne Karin som har stått bak takka. Og svelene hennar er så omtykte at rådhuset i Ørskog har tinga fast leveranse kvar onsdag. Elles er det julemessa som er det store høgdepunktet på Øyra aktivitetssenter. – Det var mange som kom innom julemessa no sist, men det var berre ørskogbygdarar. Eg såg ikkje ein einaste stordaling. Det var synd, meiner Anne Karin.