Haustfest i Ruggå
Sist laurdag var det haustfest i Ruggå 4H på skulen i Fjørå. Der var det utstilt prosjekt som dei har arbeidd med gjennom året og medlemmane stod for underhaldninga.

11. oktober 2006
Alfred Nilsen

Alle dei som fekk merke på haustfesten til Ruggå 4H.
Skulen i Fjørå er den nye forsamlingsplassen no. Lokala er flotte, og festen denne laurdagen var der barnehagen tidlegare heldt hus. Mange flotte prosjekt er utstilt og mange aspirantar får merke denne dagen. Det er prosjekt om baking, om hund, mekking, teikneseriar, jakt og fangst, dinosaurar, kanin og anna.

Årsmelding
Ruggå 4H har gjennom året hatt mange arrangement. Før jul i fjor var det ein bakekveld, solsnufest og prosjektval. Vinter og vår har det vore skitur, temakveld, bad taste-kveld, medlemsmøte, grilling, tombola, fjelltur, landhockey-turnering og no haustfest. I tillegg til dette har dei største medlemmane vore på landsleir på Tromøya. Dette var ein grøn leir der omsyn til miljøet var ein viktig ingrediens. Andre ingrediensar fekk vi vita var tordenvêr, veldig bra sanitære forhold og mange kjekke menneske. Dei yngre medlemmane har vore på fylkesleir i Todalen på Nordmøre og lært mellom anna om toving og å lage forskjellige ting med den teknikken. Andre fekk oppleve gokart og paintball.
– Eit veldig godt opplegg, og også her hyggelege møte med andre menneske, seier Lillian Almstad.

Program
Dei yngste jentene song og dansa for publikum, nokre andre fortalde vitsar. Det er morosamt når borna trekkjer pusten og kastar seg ut i det. Tre raske kvinner fortalde verdshistoria på fem minutt. Ei drivande framføring av 10. klassingane Fride Helen Almstad, Yvonne Hovden og Sanna Jarvik. Dei har øvd mykje på denne framsyninga, laga av tre raske menn. Og dette var fyrste gongen dei framførte stykket, elles har berre venner og kjende fått oppleve det. Dei var utruleg flinke og kjappe i kjeften, så andre bør abslolutt få oppleve det.

Prosjekt
Anne Sofie Almstad har hatt baking og kaker som prosjekt.
– Storesøstra mi har hjelpt meg litt, og det er morosamt å bake, spesielt bollar. Eg er også opptatt av hunden vår Birlik, slik ser han ut, seier ho og peikar på biletet som er hengt opp.
Japansk teikneseriestil er no populært i Norge, og namnet er Anima. Dei tre raske kvinnene i tillegg til Ragnhild Krogh har hatt eit fellesprosjekt med dette. Dei har møttest på fritida heime hos kvarandre og teiknar, lagar musikkvideoar og studerer dette fenomenet. Stilig er det å sjå korleis dei har klipt saman bitar frå seriar og laga musikk til.
– Kjempekjekt, seier dei og fortel at dei har brukt Moviemaker som verkty.
Anders Dale har hatt jakt og fangst som porsjekt. Han stilte ut ein mår tatt i kassefelle i tillegg til bilete og skildring av andre fangstmåtar. 1 4-talsfelle har han ikkje fanga noko anna en sine eigne fingarar fire, fem gongar. Han held til framme på Grønning og seier det er veldig spennande og sjå til fellene og lure på om det er noko. Han er med på hjortejakt og så snart han blir 14, skal han melde seg på jegerprøvekurs.
Sander Almstad hadde eit prosjekt om mekking. Han er tydeleg motorinteressert og har no gjennomført heile 4H-programmet.

Merkeutdeling
May Britt Johnsen frå Sunnmørsklubbane var til stades og delte ut merke. Ho gratulerete Ruggå 4H med det arbeidet dei har lagt ned, trekte fram den fyldige årsmeldinga og hylla dei som hadde fått ferdig prosjekta sine. Ho gratulerte foreldra for den hjelpa dei legg ned.
– Den er heilt uunværleg, sa ho.
Ho gratulerte spesielt Sander Almstad som har gjennomført heile 4H-programmet med sju godkjende prosjekt.
– Dette er verdifullt. Ver stolt og vis det fram. Dette kan du bruke i mange samanhengar, sa ho.
Ho visste av erfaring at det er travle tide før ein haustfest, men minte om at det er viktig og lærerikt med slikt arbeid og at det å kome saman er både sosialt og kjempekjekt.
– Stå på, Ruggå! sa ho.
Ho delte ut for Berit Fredriksen som ikkje var tilstades, ein perm dei hadde laga til Lillian Almstad, som lenge har hatt hovudansvaret for aktivitetane i Ruggå 4H, men som no trekkjer seg litt tilbake. May Britt Johnsen håper at nokon tek seg på tak og vil halde fram arbeidet for ungane i klubben. Det er kjempeviktig.

Merke
Hege Hovden: Miniaspirantmerke
Lene Vikene: Miniaspirantmerke
Susann Vikene: 10-årsmerke
Anne Sofie Almstad: 10-årsmerke
Vegard Døving: 10-årsmerke
Ivar Matias Glomnes: 10-årsmerke
Elling Heggen: 10-årsmerke
Odin Jæger: 11-årsmerke
Anders Dale: Bronsjemerke
Yvonne Hovden: Fagskjold
Fride Helen Almstad: Fagskjold
Sanna Jarvik: Fagskjold
Ragnhild Krogh: Fagskjold
Sander Almstad: Plakett