Endeleg breiband
Torsdag 30. november 2006 blei ein historisk dag for Liabygda skule.

13. desember 2006
Randi Flø

Arkivfoto frå datarommet på Liabygda skule.

Etter årelang venting fekk skulen breiband, melder Stranda kommune på sine heimesider.
Det såg lenge dårleg ut med breibandsutbygginga i Liabygda. Men etter iherdig jobbing frå mellom andre Øystein Lied Lunde bestemte Tafjord Mimer seg tidlegare i år for å bygge ut breiband i bygda. Tidleg no i november var utbygginga ferdig.
IKT-konsulent Gunnar Fivelstad i Stranda kommune har hovudansvar for it-løysingane til skulane og barnehagane i Stranda kommune. Saman med teknikarar frå Umoe IKT kopla han skulen til datanettet til Stranda kommune. Etter fleire dagars jobbing med tilkoplingane kunne dei konstatere at skulen kunne kutte ISDN-linjene mot internett.
Med breibandstilknytinga
har endeleg lærarar og elevar akseptabel hastigheit på internett. I tillegg når dei tilsette på skulen dei kommunale it-systema på ein mykje betre måte enn før.
Liabygda skule har hatt fokus på bruk av IKT i undervisninga i lang tid, og rektor Pål-Bjørn Øvrebust er no svært glad for at dei endeleg kan utnytte dei nye moglegheitene breiband gir i undervisninga.