Tøsse stod til eksamen
12. september 2007
Randi Flø
Charles TRøsse og Høgre står støtt i Stordal
Etter som KrF har vore fråverande siste perioden, knytte det seg ei viss spenning til korles dei ville påverke valet. Det ser ut som dei har teke stemmer frå både Senterpartiet og Høgre, men dei to mandata til KrF har kome frå Sp.
– Eg har ikkje grubla så mykje over tala, men er glad og audmjuk i forhold til den tilliten som er vist, seier Charles Tøsse og stadfestar at det har vore som ein eksamen.
Han seier at dei første skal konstituere seg, men at han håper og trur at han blir ordførar. Når det gjeld vervet som varaorførar, vil han ikkje spekulere.
– Så langt er vi ikkje komne. Vi må setje oss ned og diskutere og gå inn i ryddige og greie forhandlingar, seier Tøsse og viser til at det er sett opp plan for konstituerande kommunestyre allereie 26. september.
– Eg håper og trur på eit godt samarbeid med alle partia. Alle blir representerte i formannskapet og det er ein fordel, slik at vi kan jobbe for Stordal kommune sitt beste. Det er ei spennande samansetjing av kommunestyret med både nye og meir erfarne politikarar, avsluttar Tøsse.
Som forventa
Fremskrittspartiet tok to mandat i kommunestyret. Det same som sist. Toppkandidaten Jonas Falch seier seg tilfreds med det. Han meinte på førehand at det var heilt ope, og er derfor glad dei klarte å halde stand.
– Vi kjem inn like sterkt som sist, og vi får lov til å gjere ein jobb for bygda. Eg har også fått ein stabil mann saman med meg, Bjørn Johnny Græsmo, seier Falch.
Glad for tillit
– Eg er glad for at eg fekk tillit og eg er tilfreds med at vi har fått ein god opposisjon sett saman av dyktige folk, seier Lars Kristian Øvrebust, som stod på topp på lista til Stordal Senterparti.
Dei miste to mandat til KrF. Øvrebust seier han er forundra over at det var Sp som miste begge mandata KrF tok, i staden for at Høgre kunne ha mist eitt av dei.
Godt fornøgd
Listetoppen til Kristeleg Folkeparti, Roger Lillebø, seier seg godt nøgd med at partiet klarte å ta to mandat, like mange som dei hadde før dei tok pause ein periode. Han kunne godt ha tenkt seg at dei heller tok eit mandat får Høgre i staden for to frå Senterpartiet. Han synest at Høgre-gruppa vert noko for sterk.
Erfaring
Kanskje største overraskinga i Stordal er at Ole Johan Vidhammer, som stod langt nede på lista til Arbeidarpartiet, står som den med fleste stemmer og blir fast representant i tillegg til Palma Flåen Øvrebust. Vidhammer er også den personen i Stordal som har fått flest slengjarar.
– For min eigen del hadde eg ikkje ambisjonar om noko comeback. Eg sa ja fordi det var viktig for at partiet skulle få til liste. Eg rekna ikkje med stort anna, men det skal gå greitt, seier Vidhammer.
Valet i Stordal var for han nokolunde som venta. Det som var uventa var at KrF tok begge sine mandat frå Sp.
Ole Johan Vidhammer har 24 år bak seg både i kom-munepolitikk og i fylkespolitikk. Han har mellom anna
vore ordførar i Stordal i åtte år. Folk kjenner han og det er nok noko av grunnen til at han har hoppa så langt oppover på lista.
– Folk veit kva eg står for, og eg har ikkje tenkt å kome med noko overrasking no heller, seier Vidhammer.
Det nye kommunstyret i Stordal er samansett av fem parti. Høgre er framleis valvinnar. Nykomar Kristeleg Folkeparti tok to mandat frå Senterpartiet.
I førre periode hadde kommunestyret seks kvinnelege representantar. Talet har no gått ned til fem. Både Arbeidarpartiet, Senterpartiet og Kristeleg Folkeparti har ei kvinne og ein mann i gruppa. Fremskrittspartiet har to menn i gruppa. Av sju representantar har Høgre berre to kvinner.
