Frå åker til handlekorg
På Valldal Grønt sitt anlegg i Valldal går produksjonen av frosne bær pakka i 400-grams pakkar for fullt. No har frosne kvalitetsbær under merkevaren “Valldal” kome inn i grunnsortimentet til meir enn 200 nye butikkar over heile landet.

9. april 2008
Alfred Nilsen

Dagleg leiar i Valldal Grønt, Harald Valle synst det er ein spennande og utfordranede jobb å få bær frå Valldal ut på markedet.
– Vi har jobba mykje og brukt store ressursar, men no er vi i ferd med å lykkast, seier Harald Valle, dagleg leier i Valldal Grønt.
Tidlegare har den singelfrosne bringebæra og jordbæra vore å finne i om lag 50 butikkar, som då hadde produkta inne som frivillig sortiment. Det betydde ein heil del salsarbeid mot butikkane og ein kostbar logistikk.
– No skal butikkane ha dette inne til ei kvar tid og det gjer salsarbeid og distribusjon mykje enklare og meir effektivt, seier ein optimistisk dagleg leiar.
Det er butikkjedane Ultra, Eurospar og Meny i Norgsgruppen dei no er komne inn.

Godt produkt
Det startar med produsentane sin kunnskap og deira vilje til å framskaffe eit godt produkt. På mottaket i Valldal vil den beste industribæra i år også bli sortert ut til bruk i den nye produksjonen. Når ein hektisk sesong er over tar dei fram produktet, som for all framtid vil assosierast med Valldal, pakkar ho og sender produktet ut på marknaden. Slik får dei utnytta eksisterande ressursar på ein betre og meir effektiv måte, noko som betyr auka lønsemd.
– Vi må vere flinke i alle ledd. Det er mange og strenge krav og alt må kontrollerast, seier Harald Valle.
Valldal Grønt har rikeleg med jordbær, bringebær trengst det meir av etter kvart. Dei satsar på å kunne levere ein stad mellom 50 og 100 tonn på eit rullerande år (frå sommar til sommar).

Distribusjonsnett
– Det er mykje som skal på plass, men no når volumet aukar, blir det lettare å organisere, seier Harald Valle.
– Det fungerer slik at det er vi som må sørgje for transport av varene til alle Asko sine lager rundt om i landet. Der vert dei vidaredistribuert ut til butikkane.
I fjor haust fekk dei òg på plass ein samarbeidsavtale om butikkoppfølging og salgsarbeid med Lofotprodukt AS, noko som også gjer at varemerket Valldal blir ytterlegare eksponert.
– Dette har vi tru på, og det er ei spennande framtid som ventar oss, avsluttar degleg leiar i Valldal Grønt, Harald Valle.