Kyrkjehola kulturbeite

		Opning av kulturbeitet
						Med minioperaen “Prinsessa på Selja” opna Kyrkjehola Kulturbeite sesongen i Rosekyrkja søndag.
							18. juni 2008 John Kristian Hjelle
			Dei sju jentene Mathilde vinje Øvrebust, Amalie Ekroll Hove, Helga Løset Skodjereite, Jenny Marita Sørås, Gunn Eli Hjelle, Julie Olsen Almås og Rebekka Helland frå Stordal var med på minioperaen. Her står dei saman med solistane Sara Eriksson og Magne Fremmerlid.
	Før forestillinga starta opna leiar av fylkeskulturutvalet, Rigmor Andersen Eide, offisielt årets Kyrkjehola Kulturbeite. Ho skrytte av årets program, og sa at det var ei ære å og ei glede å stå for opninga. – De har her gjennom ni år lykkast i å etablere ein kulturarena, som både er nyskapande, prega av utframføringar og som bind saman fortid og notid. Eg sit i styret for Molde jazzfestival, og der jubla vi stort då vi fekk Marilyn Mazur på programmet. Så ser vi i programmet for Kyrkjehola Kulturbeite at ho også skal opptre i Rosekyrkja i Stordal. Stordalingane bør vere stolte over det visjonære og modige styret for Kyrkjehola Kulturbeite som torer å tenke stort, og som får til ein kulturfest som varer heile sommaren. Ho sa at kulturbeitet har vorte eit regionalt kulturprosjekt som berre veks og veks. – Odd Johan Overøye har sett sitt kvalitetsstempel på det som har skjedd her på Kyrkjehola Kulturbeite gjennom desse åra, og i dag får vi høyre hans eigen musikk. Hald på det eksklusive og intime, bli verande her, og lykke til med årets kulturbeite. Eg ser fram til mange fine sommaropplevingar, avslutta ho. Støtta av kulturrådet Oppsetjinga av minioperaen er støtta av Norsk Kulturråd. Teksten er skriven av Eivind Skeie, og musikken er komponert av Odd Johan Overøye. Han sat sjølv bak tangentane under forestillinga, og i orkestet sat Kristina Malene Stavseng med fiolin. Saman med seg hadde ho også Erlend Eide på klarinett og blikkfløyte, Frode Grønmyr på gitar, Tor Dyrset på kontrabass, Andreas Håkestad på percussion og Ola Eide på orgel. Koristar kom frå «Kor Kjekt» frå Sykkylven, Spjelkavik Barnekor, Spjelkavik Ungdomskor, eit samansett mannskor og 7 jenter frå Stordal Barnekor. Dirigent og musikalsk leiar var Rose Iren Stave, medan Kirsti Ramnefjell stod for regien. Forteljar i førestillinga var Trine Ramnefjell, medan Sara Eriksson og Magne Fremmerlid var solistar. Sara Eriksson hadde stilt på på kort varsel etter at Ragnhild Eide Akslen måtte melde sjukdomsfråfall. St Sunniva «Prinsessa på Selja» omhandlar prinsessa Sunniva som må flykte frå ein krigersk konge på øya Eire som vil ta henne til kone. Ho vert ført i ein båt utan ror over havet, og strandar på Selja ved Stadlandet. Der leid ho martyrdauden. Ho vart Norges første helgen og vestlandet sin skytshelgen, og det vart reist eit kloster på Selja som vart eit av dei tre første bispeseta i Norge. I forestillinga er segna om St. Sunniva dramatisert og handlinga vert driven fram av musikk, korsong og song av solistane, samanbunde av forteljaren. Vakker musikk og vakker sang, og imponerande stemmeprakt hos begge solistane. Born frå koret var også med i handlinga, dei delte mellom anna ut blomar til tilhøyrarane som symboliserte blomane som etter segna grodde i St. Sunniva sine fotspor då ho gjekk opp til grotta på Selja etter strandinga. Forestillinga vart også vist i Sykkylven kyrkje fredag kveld. – Strålande bra Bjørnar Midtbust og Leif Dybdal frå styret i Kyrkjehola Kulturbeite seier i ein kommentar at dei tykkjer oppmøtet til minioperaen var strålande bra. Det var om lag 190 betalande til stades på forestillinga i Rosekyrkja.