Den nye reiselivssjefen
Måndag 30. juni, midt i den mest hektiske turistperioden, tok Ronny Brunvoll til som reiselivssjef for Destinasjon Geiranger-fjord–Trollstigen AS. Han skal ha hovudbase i Geiranger.

11. september 2008
Anneli Rem

Reiselivssjef Ronny Brunvoll på hamna i Valldal på veg til møte med assisterande reiselivssjef i DGT, Ove Skylstad.
Ronny Brunvoll har mellomfag i fransk og høgskuleutdanning i marknadsføring og økonomi. Han kjem frå Harøya utanfor romsdalskysten. Han er gift og har to born og har budd på Valderøya dei 13 siste åra. No har han fått hybel i Geiranger og blir vekependlar.

– Handlingsretta
Tidlegare har Brunvoll mellom anna arbeidd sju år i Sunnmørsposten med distribusjon og sal. Deretter var han prosjektleiar og marknadsjef for Sunnmørshallen og Color Line Stadion. Då han fekk tilbod om jobben som reiselivssjef, var han ikkje i tvil om å takke ja.
– Mi sterke side er at eg er handlingsretta. Eg vil føre ting frå tankestadiet til handling. Eg likar å jobbe med prosjekt, få framdrift og få ting gjennomført, seier Ronny Brunvoll.

Samarbeid
I den nye jobben skal han ha eit nært samarbeid med assisterande reiselivssjef,
Ove Skylstad.
– Vi skal samarbeide og dele på ulike oppgåver. Det er viktig å byggje vidare på det som har vore bra, og samtidig utvikle og gjere endringar der det krevst. I arbeidet med marknadsføring er eg opptatt av å ta gode val. Kva marknad vil ein nå, kven er
målgruppa og korleis nå
denne, er viktige spørsmål å jobbe ut frå. Det er mykje jobb og mangfaldig arbeid, eg er framleis i ein lærefase, seier Ronny Brunvoll.

Produktutvikling
Sentralt i arbeidet er drift av turistinformasjonane i Valldal, Geiranger, Eidsdal, Hellesylt og Stranda, marknadsføring og produktutvikling.
– Området er fantastisk. Vi vil stimulere til ei utvikling i produkta her slik at turistane skal synest det er interessant å
stoppe opp og overnatte. Å leggje til rette for å få til ein utvida turistsesong, frå mai til september i første omgang, er også ei viktig arbeidsoppgåve.

Reiselivsmøte
Ronny Brunvoll gler seg til dei komande møta DGT skal ha med reiselivsnæringa i Valldal, Geiranger og på Hellesylt. Då skal marknadsplanen for 2009 diskuterast saman med vidare planar for treårsperioden dei er inne i.
– Vi er eit overordna marknadsføringsorgan for alle reiselivsbedrifter som er organisert i selskapet. 53 bedrifter er med som direkte eigarar, og kring 200 foretak har ei form for eigarinteresse i selskapet. For å lukkast er det viktig å tenkje heilskap og samarbeid. Det er viktig å drage saman på tvers av bygde- og kommunegrenser, seier Ronny Brunvoll.