Ungdomsråd

	Ungdomsråd for første gong
					Torsdag 16. oktober vart det første ungdomsrådet i Stordal valt.
						23. oktober 2008 John Kristian Hjelle
		Det nyvalde ungdomsrådet i Stordal sitjande framfor resten av ungdommane som var på møtet. F.v.: Erika H. Tøsse, Ida Moltu Staurset, Lars Eivind N. Joranger, Kristoffer N. Joranger og Eline Vinje.
		30 unge frå 13 til 19 år møtte opp på møtet i Grendasalen, der folkehelsekoordinator Bjørg Moltu saman med kulturkonsulent Hallgeir Hove ønskte alle velkomne med pizza og brus. Til stades var også ordførar Charles Tøsse og varaordførar Jonas Falch, og representantar frå ungdomsrådet i Ørskog. Rolla Ordførar Charles Tøsse som tykte det var positivt at så mange møtte opp, orienterte mellom anna om kva rolle ungdomsrådet skal ha, gratulerte med dagen og ynskte lykke til med arbeidet. I Ørskog har dei hatt ungomsråd sidan 1995, og dei to representantane derifrå fortalde møtelyden om sine erfaringar med ungdomsråd i Ørskog, før dei fem representantane i ungdomsrådet i Stordal vart valde. Samansetjing Ungdomsrådet skal vere samansett av tre representantar valde av og blant elevane på ungdomsskulen og to representantar valde av og blant ungdomsgruppa 16–19 år. Det vart eit spennande val, der det måtte omrøysting til i fleire omgangar før ein endeleg hadde alle representantane klare. Frå ungdomsgruppa 16-19 år vart Lars Eivind N. Joranger og Ida Moltu Staurset valt, medan Eline Vinje, Kristoffer N. Joranger og Erika H. Tøsse vart valt frå ungdomssteget (8-10. klasse). Innspel Hallgeir Hove og Bjørg Moltu nytta også høvet til å få innspel om korleis ungdommen tykkjer det er tilrettelagt for unge i Stordal, kva som fungerer bra, kva som kan verte betre og kva dei saknar. Det kom her fram mange gode innspel som det nyvalde styret i ungdomsrådet kan ta med seg vidare i arbeidet sitt. Gjennom ungdomsrådet kan ungdom ta opp saker, og legge desse fram for politikarane og administrasjonen i kommunen. Ungdomsrådet skal òg vere eit høyringsorgan for kommunestyret, og leiar og nestleiar i ungdomsrådet har forslags- og talerett i kommunestyret. Ungomsrådet skal også vere dei unge sine representantar i styret for Stordal Ungdomsklubb.