Storbesøk til storøvinga
Justisminister Knut Storberget, statssekretær Terje Moland Pedersen og politidirektør Ingelin Killengreen var ein snartur innom Valldal under siste dag av øvinga Tyr.

30. oktober 2008
Randi Flø

Justisminister Knut Storberget helsar på kriseleiinga i Norddal kommune.
Dei landa med Politi-helikopter utanfor rådhuset i Valldal onsdag føremiddag. Justisminister Storberget hade lagt merke til alle ungane i barnehagen som stod og såg på det sjeldne besøket, så han tok like godt ein svipptur bortom for å snakke med ungane.

Raset
Gjestene var først ein tur innom kontoret til ordførar Bjørn Inge Ruset før dei besøkte kriseleiinga som sat i kommunestyresalen.
Leiar for den kommunale kriseleiinga, Viktor Valdal, fekk i oppdrag å informere om situasjonen i øvinga. Han kunne fortelje at raset hadde gått rundt klokka ni denne morgonen. Det var store materielle skadar, men ingen liv hadde gått tapt så langt dei kjende til. Det var framleis fare for fleire ras. Straumforsyninga var ute av drift. Det same var telefonsambandet. Dei mangla politifolk til Førå og Tafjord. Derfor måtte folk frå Tafjord Kraft setjast inn. Trollstigen vart opna og det vart henta medisinar frå Rauma. Det var også planlagt folkemøte rundt om i dei ulike bygdene.
Justisministeren ville vite kvar knekkpunkta er i ein reell situasjon. Viktor Valdal svarte at det er spesielt utfordrande å sile informasjon og at kommunikasjonen er viktig. Han sa at dei har eit godt samarbeid med politiet. Dessutan har dei fått øvd på kva dei ulike etatane skal gjere og fått det til å fungere.
Politidirektør Ingelin Killengreen ville vite om rollefordelinga er grei, og fekk til svar at det er ho. Lensmannsbetjent Johan Arnt Overøye peika på at han ikkje har utstyr til å følgje
med på fellesloggen. Han har ikkje berbar datamaskin tilgjengeleg.

Utvikling
Justisminister Knut Storberget ville ikkje seie noko om regjeringa sine prioriteringar når det gjeld løyvingar til Åknes/Tafjord-prosjektet.
– No er eg her i høve øvinga, for å sjå korleis det fungerer, sa Storberget til Storfjordnytt og la til at han hadde fått god kjennskap til Norddal kommune sine utfordringar når det gjeld utvikling på den eine sida og risikoen for ras på den andre. Han sa at han kjende seg beroliga etter samtalen med ordføraren som ser behovet for å utvikle kommunen.
– Også andre stader i landet er det risikofjell som Åknesremna. Kan beredskapssenteret og arbeidet her vere eit føregangsdøme for andre?
– Det er klart at arbeidet som blir gjort her, kan vere til nytte andre stader i landet. Det er derfor vi har valt å bruke så mange ressursar her, sa Storberget før han gjekk inn att i helikopteret med kurs for Stranda.