Ballbingen er oppe
Førre laurdag var det dugnad for å få opp ballbingen på Valldal skule. Søndag var han speleklar.

13. november 2008
Anneli Rem

Laurdag var siste dugnadsdag før ballbingen var ferdig, men denne karen viser alt hoppande glede for å få ein av dei største ballbingane i distriktet.
– På laurdag var det dugnad på sjølve rigginga av ballbingen, men det har vore mange vender med dugnad, seier Per Jomar Nerli, som har leidd prosjektet.

Foreldreinnsats
Han fortel at det er foreldre som har vore engasjert og stilt på, med alt frå graving, forskaling, støyping av fundament, fylling av masse, til å få på plass graset og karmane.
– Etter planen skulle ballbingen vore ferdig tidlegare, seier Per Jomar Nerli.
Det har vore planlagt ballbinge sidan 2005, og arbeidet har teke meir tid enn venta. Men no er han på plass og kan vere til fritidsbruk for alle som vil spele fotball.

Nærmiljøanlegg
Ballbingen er eit nærmiljøanlegg, og skal ikkje vere til organisert bruk. Kommunen har fått tippemidlar og gåvemidlar frå Sparebanken Møre til finansieringa av ballbingen.
Ballbingen er levert av Scansis, og måler 18 gongar 33 meter. Sjølve ballbingen kosta 300.000 kroner, og er av dei største her i distriktet.