Hevda seg godt i junior-NM
BARDUFOSS: – Det var litt skuffande at eg ikkje fekk betre utteljing i skøyting som er favorittstilarten. På ti kilometer klassisk og i kretsstafetten er eg svært tilfreds med prestasjonane mine, sa Lars Anders Hoel.

26. februar 2009
Randi Flø

Geir Marius Øie var ein av dei frå vårt fylke som overraska positivt. Foto: Svein Halvor Moe

Valldalsløparen hadde grunn til å vere fornøgd med innsatsen i junior-NM. Lars Anders hadde bortimot full klaff i to av tre renn. 27.plassen er noko av det beste han har gjort i nasjonal samanheng. Nivået i norsk juniorlangrenn er ekstremt høgt. Breidda er stor i ein idrett der du skal gå fort for å bli blant dei 100 beste i NM. Hoel som har sitt daglege virke på idrettslinja på Stranda, var inneforstått med at det ville bli tøft å hevde seg i junior-NM. Han bestemte seg likevel for å leggje lista høgt i forkant av opningsdistansen. Andreårsjunioren sikta seg inn mot topp 20-plassering. Det gjekk litt for tungt til at han klarte å kjempe så høgt opp på resultatlista. 44. og premieplass i dette selskapet let seg også høyre av ein kretslagsløpar.

Opptur
– Eg fikk ikkje den opninga eg ønskte og var spent på fortsettelsen. Laurdagens tikilometer vart klart ein opptur. Det var godt å kjenne at kroppen fungerte, sa Lars Anders til lokalavisa.
Han fekk oppmuntrande tilbakemeldingar allereie på dei første sekunderingspostane. Hoel gledde seg over at kroppen responderte då han ga på i bakkane. Dei var det mange av i det idylliske NM-anlegget. 17-åringen følte han fekk tatt ut alt og var tilfreds med innsatsen da milløpet var over. Fornøgd var han også med søndagens stafettetappe. Møre og Romsdal hadde eit brukbart lag på papiret i kretsstafetten. Kvartetten gjekk inn til 17.plass som var litt under pari.

Nye NM-muligheiter
Lars Anders og Geir Marius Øie frå Stordal får høvesvis to og tre muligheiter til å forbetre den plasseringa. Begge har så vidt innleidd juniorkarrieren. Geir Marius var ein av dei store positive overraskingane sett med Møre og Romsdal-auge. Førsteårsjunioren klinka også til i det klassiske rennet. Lik den eitt år eldre valldalingen, kunne han juble over 27.plass. Fornøgd var også juniorkretslagstrener Bjørnar Øye. Ørstingen har dei to siste åra brukt mykje energi på å leggje forholda til rette for dei beste juniorane i fylket. Lars Anders er full av lovord om opplegget på kretslaget og på skulen. Det forklarer mykje av framgangen.

– Inspirerande
– Det er voldsomt inspirerande å få trene saman med gode løparar på dagtid. Eg trur både eg og Geir Marius har hatt nytte av det. Flesteparten av oss kjem frå små klubbmiljø. Derfor er det viktig å ha ein felles treningsarena i skule og kretsregi. Den flotte innsatsen i junior-NM inspirerer heilt klart til vidare satsing. Dei to siste norgescuprenna i Harstad har eg bestemt meg for å droppe. Norgescupfinalen på Røros er eg heller ikkje kvalifisert for. Det endar nok opp med at eg går mest lokale renn resten av sesongen. Birkebeinerrennet er eitt av arrangementa eg vurderer, sa Hoel.
Han ber oss få med at Geir Marius Øie gjekk ei glimrande stafettetappe. Stordalingen beit godt i frå seg i kamp med to og tre år eldre gutar.