Kulå på beina att
Eit nytt aksjeselsap har kjøpt konkursbuet etter Kulå. No vert det nyopning.

2. april 2009
Randi Flø

Valldal Bowlingsenter AS var konkurs tidlegare i vinter, no er eit nytt selskap med gamle aksjonærar skipa og drifta av Kulå kjem i gang att.
Nokre av dei gamle aksjonærane står bak det nydanna aksjeseskapet som har namnet Kulå Bowling AS. I tillegg har dei med seg gruppa Zephyr, noko dei seier seg svært glade for, ikkje minst på grunn av kompetansen dei karane sit inne med.
Dei nye eigarane er godt nøgde med at Sparebanken Møre har prioritert vidareføring av lokalstyrt drift.

Opning
Dei ventar framleis på at ein del formalitetar skal på plass, men håper på at det blir opning allereie komande laurdag. I alle fall blir Kulå opna på nytt i løpet av påska.
– Vi ber folk om å følgje med. Vi kjem med opplysningar etter kvart, seier dei.
Planen er at Party Express skal spele på onsdag før skjærtorsdag og at Zephyr skal spele på påskeaftan.
Dei opplyser at det vert visse endringar i drifta, som vil merkast etter kvart. Bowlinanlegget er oppgradert og klart for ny innsats. Dei ventar å få permanent dagleg leiar på plass etter kvart.