Prest

	Vil halde på eigen prest
					At Stordal vart eige sokn med eigen sokneprest er noko av den mest positive kyrkjelege ordninga som har kome Stordal til del på uminnelege tider. Både kommunestyret og soknerådet går imot framlegget frå prosten om å dele prest med Ørskog.
						7. april 2009 Randi Flø
		Kommunestyret i Stordal ynskjer å ha eigen sokneprest som er busett i kommunen. Arkivfoto
		Stordal sokneråd skriv i eit brev til Møre bispedømeråd at dei har vore svært godt nøgde med å ha eigen sokneprest frå 1. januar 2007, etter tidlegare å ha hatt prest saman med andre sokn. Ledig prestestilling Etter at sokneprest Nils Beite gjekk av med pensjon 1. mars, er no stillinga som sokneprest i Stordal ledig. I samband med dette vil prost Øystein Kjølberg gjere endringar. I eit notat skriv han at etter samtalar og forståing med bispedømekontoret går han inn for å gjere justeringar for å gi prosten betre rammevilkår til å gjere tenesta som leiar i prostiet. Han vil at soknepresten i Stordal også skal verte sokneprest i Ørskog og jobbe i team saman med dei to andre sokneprestane, i Skodje og Norddal. Prosten meiner at dette teamarbeidet skulle vere ein fordel for alle dei fire sokna. Bustad Stordal sokneråd skriv til bispedømerådet at dei hadde vona å få ein sokneprest som kunne bu i bygda når stillinga no vart ledig. Allereie i februar i fjor tok kyrkjeverjen i Stordal opp spørsmålet med bispedømerådet. I juni i fjor gjorde soknerådet vedtak. Dei meiner at dersom både soknepresten i Stordal og Ørskog og prosten i Austre Sunnmøre prosti skal bu på Ørskog, må ein skaffe ny bustad sidan det ikkje er meir enn ein tenestebustad tilgjengeleg. Denne bustaden kan etter deira meining like gjerne vere i Stordal som på Ørskog. Dei finn det urimeleg av både sokneprest og prest skal vere busett på Ørskog og ber dispedømerådet vurdere situasjonen og ta omsyn til Stordal sitt ønskje. Strekkje seg På møtet i kommunestyret i Stordal onsdag vart det samrøystes vedteke å sende ein uttale som støttar soknerådet. Dei ser på ei deling av soknepreststillinga mellom Stordal og Ørskog som ei reversering av den gode omlegginga som skjedde for ei tid sidan. Dei vil ikkje at framlegget frå Kjølberg skal verte ei permanent ordning. Stordal manglar ein sokneprest som er busett i kommunen, og kommunestyret vil strekkje seg langt for å få det til.