Laksesesongen godt i gang
Både i Stordal og Valldal vart det teke laks då elva opna laurdag 20. juni.

25. juni 2009
Randi Flø

Til høgre Willy Strandkleiv som fekk begge laksane på Holt søndag. Dei var 7,2 og 8,6 kg. Svein Ødeggard hjelper til med å vise dei fram. Foto: Jarle Hove
– Opninga av fisket i Stordalselva har vore rimeleg god, seier Jarle Hove.

Spreidd
Han viser til at det også har vore jamt god spreiing av fangst framover elva. Det er godt med fisk i elva og vassføringa er heilt perfekt. Stordal elveeigarlag har eiga heimeside der fangstrapporten vert oppdatert kvar veke.
Rapporten viser at det vart teke tolv laksar allereie første dagen. Dei to største er tekne ved Jøsvoll og vog 10,8 og 9 kilo.

Fanga på Hoel
– Det viser seg at det var ein del laks som hadde gått opp tidleg. Det vart fanga laks på Hoel allereie første dagen, og det er ikkje så ofte, seier Aksel Døving i Valldal elveeigrlag.
Han har ikkje eksakte tal, men viser til at det har vore ei god opning i elva, der det har vore fiska ein del laks og fleire store, mellom seks og ti kilo.
I Valldal er det ein laksebørs som vert oppdatert ved turisinformasjonen.