Får høve t il å levere byggjesøknad
10. september 2009
Tiril Rem
Driftsutvalet hadde synfaring i Muribugen før sakshand-saminga førre onsdag.
Før driftsutvalet handsama saka førre onsdag drog utvalet på synfaring til Muribugen. Grunneigaren var til stades og forklarte at han hadde handla i god tru.
Hans K. Muri mislikte at han hadde fått høyre at han burde ha visst at han skulle ha byggjemeldt arbeidet med naustet.
– Eg har restaurert både sel og fjøs i Herdalen, gamlehuset på Muri og sanitærbygningen på campingplassen utan byggjemelding. Intensjonen min har vore å restaurere og halde ved like det eg er sett til å ta vare på.
– Ikkje verneverdig
Då Hans K. Muri kjøpte det gamle “Per-naustet”, var han i kontakt med kulturavdelinga på fylket som sa at det gamle naustet ikkje var verneverdig. Han vart likevel oppmoda om å bruke gammaldags bølgjeblekk innsett med steinkoltjøre på taket.
Fordi vatnet kjem over brygga vår og haust sette han naustet på 40 cm høge dragarar. Han flytta det òg ca tre meter nordover og nærare sjøen for å gje plass til ein mogleg framtidig gang- og sykkelveg utover til Linge.
– “Hansen” var i god tru, forklarte han sjølv.
– Dessutan vil eg nemne at både sakshandsamar og rådmann køyrde forbi her kvar dag då naustet vart reist. Viss det ikkje var rett, kunne eg ha fått eit ord om å gjere det slik og slik for å få det i orden. Då eg fekk første brevet frå kommunen, stod berre dørene att. Det er beklageleg. Eg ville ha ordna dette på beste måte om eg hadde visst betre.
Rullestolbrukarar
Naustet skal vere lagringsplass for 30-40 redningsvestar, årer, bensintankar og anna utstyr i samband med båtutleige.
– I våre dagar lyt ein låse inn det ein har, sa Hans K. Muri.
– Iallfall på denne sida av fjorden, kvitterte Bjørn Helge Rønneberg.
Ein skjerma uteplass strekkjer seg langs austsida av naustet. Hans K. Muri forklarte at ein tysk gjest som sit i rullestol, har bede om å få fiske frå uteplassen.
– Det var difor eg kledde inn plassen. Om naustet får stå, skal eg setje inn ei breiare dør slik at rullestolbrukarar kjem seg inn.
Leiar i driftsutvalet, Svein Linge, kommenterte at naustet har vore flytta frå den opphavlege tomta.
– Eg flytta det i god tru med tanke på at det kanskje går an å få til ein gangveg. Saman med andre grunneigarar har eg skrive under ein søknad om STILK-midlar. Det gjorde eg i si tid til Bedringens veg også. Der var det òg motstand, men sjå kor populær den vegen har blitt. Eg skal prøve å vere positiv. Eg forstår at mange kjem til å bruke ein eventuell veg som kjem her, sa Hans K. Muri.
– Underleg
Sakshandsamar Lars Kjell Smoge sa at det var mykje han kunne ha sagt då Svein Linge bad han uttale seg.
– Det er underleg at han held fram arbeidet like godt når han får eit brev om å stoppe bygginga. Bygginga heldt fram etter andre brevet òg. Det er rimeleg klart sagt at vedlikehald ikkje er meldepliktig, men nybygg og endringar der funksjonar ikkje er kjende, er det. Staden er regulert til eit vanleg naust med tilflot, sa han.
– Kva er meldepliktig, ville grunneigaren vite.
– Reint vedlikehald er det ikkje meldeplikt på, men flyttar du naustet er det ei ny sak, svarte sakshandsamaren.
– Eg kan godt flytte det tilbake. Det er berre å løyse boltane. Naustet er så godt samanskrudd at det berre er å flytte det attover, sa Hans K. Muri.
– Om du flyttar det tilbake, blir det plass til gangveg då, undra Svein Linge.
– Nei, då blir det ikkje plass, svarte Hans K. Muri.
– Krev dispensasjon
Lars Kjell Smoge sa at det ikkje har vore prøvt noko sak om dispensasjon frå reguleringsplanen.
– Dette krev ein dispensasjon. Gang- og sykkelveg er heller ikkje vedteke. Eg må halde meg til vedtak, sa han.
Bjørn Helge Rønneberg spurde Hans K. Muri korleis det ser ut framover.
– Om eg får ha naustet, kjem eg til å leggje ut ei flytebrygge som Kystverket har godkjent. Kva kommunen gjer, veit eg ikkje. Eg har fått rivingstrussel mot den òg.
Svein Linge ville vite om rullestolbrukarar frå Muritunet òg kunne få tilgang til naustet.
– Eg kan vurdere å ha open tilgang om dagen, men låse om kvelden. Dei funksjonshemma er ei gruppe vi må ivareta. Sidan vi fekk rullestolramper på hyttene, har vi fått fleire funksjonshemma gjester.
– Formelt står Hans K. Muri svakt, politisk er det ei anna sak, sa Svein Linge.
– Er du viljug til å ta papirmølla som må til, spurde Bjørn Helge Rønneberg.
– Ja, seinast i dag snakka eg med juridisk avdeling på fylket for å få trekt opp ei line. Om eg ankar vedtaket, går saka til Molde. Eg ynskjer å gjere dette lovleg, sa Hans K. Muri.
– Det er fleire som har sett i gang utan løyve i Norddal kommune, sa driftutvalsleiaren.
– Eg fjernar gjerne naustet. Det skal ta meg nokre få timar med gravemaskin, sa grunneigaren.
Nei til riving
I debatten som følgde innomhus sa Svein Linge at han hadde snakka med mange som meinte det var dumt av Hans K. Muri ikkje å ha kome med ein søknad.
– Det var semje om at ein søknad ville ha gått greitt gjennom. Dette er eit godt tiltak for bygda, ein badeplass som ikkje er skjemmande. Det er kritikkverdig at han har flytta naustet og ikkje søkt om byggjeløyve, men med den grunngjevinga at det er mogleg å lage ein gangveg, er det meir forståing politisk for at saka skal gå gjennom, sa han.
Regulert til naust
Bjørn Helge Rønneberg ville høyre med administrasjonen om kva planar som ligg i området.
– Går vi i eit minefelt om vi slepper til eit naust der det er regulert til badeplass? Har vi ryggen fri om vi gjev løyve berre han samlar saman dei papira om skal til?
Sakshandsamar Lars Kjell Smoge opplyste at staden er regulert til naust, eit vanleg naust med tilflot til sjøen.
– Han har ikkje presentert kva han vil med bygget. Det veit vi ikkje anna enn hans ord. Det er pappa og stelt med store glas osv. Vi har ikkje fått noko vi kan vurdere, men det er neppe eit naust slik som reguleringsplanen legg opp til.
Lars Kjell Smoge peika òg på at sanitærhuset vart bygt opp att ein meter utom det gamle. Det måtte han i si tid byggjemelde og betale gebyr for.
Krev søknad
Rådgjevar Per Ove Nydal som var sekretær på møtet, sa at det ikkje er tvil om at byggjearbeidet krev søknad etter plan- og bygningslova.
– Frå vår side er saka så enkel at eit bygg er reist utan løyve. På den andre sida: Om det hadde blitt byggjemeldt og følgt alle prosessar, ville han ha fått løyve. Om sakshandsamar er usamd i det, gje meg eit hint. – Dispensasjonssaker skal handsamast politisk, svarte Lars Kjell Smoge.
Fleire medlemmer av driftsutvalet gav uttrykk for at Hans K. Muri ikkje hadde gått fram som han skulle, men at han langt frå er åleine om å ha gjort det i Norddal kommune. Somme var òg inne på at ein måtte sikre seg at dette er eit naust og ikkje ei hytte.
– Ikkje politi
Kjell Arne Valdal (Ap) peikte på det Hans K. Muri sa om at både rådmann og sakshandsamar hadde køyrt forbi naustet dagleg.
– Vi kan ikkje påleggje folk som arbeider i kommunen, å vere politi og følgje med på kva som skjer. Den som skal gjere noko, må søkje. Sånn må det vere. Det han har bygt, er ikkje eit naust lenger. Det er ikkje plass til eller råd å få ein båt inn der. Slik eg ser det, er det ei nybygg og ei driftsendring. Samtidig ser eg at det som er gjort, ikkje er gale. Han må få ein frist på seg for å søkje, sa han.
– Rådmannen brukar ordet naust, kommenterte Svein Linge.
– Vi treng ikkje å diskutere naust. 50 prosent av nausta i Norddal har ikkje båtar i seg. Vi må få til ei løysing. Det er steikjande idioti å rive det ned att, sa Bjørn Helge Rønneberg og foreslo eit plaster på såret til kommunen:
– Om det blir gang- og sykkelveg der, skal Norddal kommune få bruke grunnen vederlagsfritt. Når han har flytta naustet, kan han forplikte seg til å gje frå seg grunn. Det er ein liten smekk på lanken.
Laila Olsen sa seg samd i det og meinte at det må ha vore ein kommunikasjonssvikt eine eller andre vegen.
– Vi kan gje dispensasjon denne gongen, men vere striks i vedtaket på at folk ikkje berre kan byggje og så få løyve etterpå, sa ho.
– Det at kommunen vil reagere må inn med teskei. Vi må ramse opp det kommunen vil ha stoppa utan at løyve er gjeve. Det må ikkje vere mogleg for nokon å mistolke det, sa Svein Linge og foreslo eit vedtak i tre punkt.
Etter diskusjon i utvalet var dei samde om eit fellesframlegg i fem punkt som vart vedteke samrøystes.
Avklaring
Storfjordnytt kontakta rådmann Stig Holmstrøm som ikkje var med på møtet i driftsutvalet, med spørsmål om kva vedtaket kan innebere. I vedtaket trekkjer driftsutvalet inn spørsmål om kompensasjon for eventuell avståing av grunn og går langt i å førehandsgodkjenne ein byggjesøknad.
– Vedtaket inneber ein del uklare forhold som eg treng tid til å gå gjennom og få ei avklaring på, er alt Stig Holmstrøm vil seie førebels.
1. Driftsutvalet ser at sak om restaurering av naust på gardsnr 4 brnr 1 har både ei administrativ/ formell side og ei politisk side. Driftsutvalet ser klart at restaureringa av naustet reint formelt er ei sak som skulle vore byggemeld i og med at restaureringa inneber forskyving av byggestaden til naustet. Men ein ser samstundes at denne forskyvinga er grunna ønskje om å få til ein gang og sykkelveg til Linge nord for naustet, noko som ville ha vore uråd/ svært kostbart dersom ikkje restaureringa av naustet hadde blitt slik det no er gjort. Det er søkt om STILK-midlar til denne vegen – dvs det er ein veg det er politisk ønskje om å få til.
2. Norddal kommune får bruksrett på område bak naustet vederlagsfritt ved ei eventuell seinare utarbeiding av gang og sykkelsti til Linge.
3. Driftsutvalet ber tiltakshavar søke om iverksatt tiltak på etablerte skjema for tiltaket. Fristen for innsending av skjema er 1. oktober 2009. Arbeidet på tiltaket skal stoppast til utfallet på søknaden er klart.
4. Driftsutvalet meinar at dersom tiltakshavar hadde søkt om byggeløyve, som han skulle ha gjort, ville byggeløyve av naustet blitt innvilga. Fordi slik naustet no er bygd gjer det lettare å få til gang og sykkelveg mellom Muri og Linge.
5. For å unngå å kome i liknande situasjonar som ved restaurering av dette naustet ber driftsutvalet administrasjonen leggje fram ei sak til utvalet som skal innehalde:
Konsekvens ved overtredelse av reglar der Norddal kommune er mydigheit så som:
Tiltak iverksatt utan byggeløyve
Bossbrenning
Bosstømming