Avslag til halvparten

19. november 2009
Sissel Tiril Rem

Rempro får 200.000 kroner frå næringsfondet for utvikling av eit produkt til oppdrettsanlegg.
Foto: Alfred Nilsen

Hoppekassa
I runden med spørsmål innleiingsvis kommenterte Viktor Valdal (Tvpl) at det i hoppekassa, næringsfondet for ungdom, står 190.000 kroner.
– Det er eit positivt tiltak, men tek vi for hardt i der, undra han.
– Det er ikkje så mange som hoppar for tida, sa næringssjef Toralv Klokkehaug og viste til at det i utgangspunktet var meininga å satse på elevbedrifter gjennom skulane.
– Det har ikkje slått an i det heile tatt, sa han og stadfesta at kun 10.000 kroner er brukte.

Strategisk utvikling
Audun Skjervøy (Nl) meinte at det er uklart kva dei 400.000 kronene som er avsette til strategisk næringsutvikling, skal brukast til og korleis dei skal brukast.
Han foreslo å legge summen inn i vanlege næringsfondsmidlar, alternativt å be om retningsliner for bruken av midlar til strategisk næringsutvikling.
Viktor Valdal peika på at slike midlar kan nyttast til kommunal infrastruktur og spleiselag. Næringssjefen meiner at dei til saman 800.000 strategiske kronene kan brukast som tilskot til DGT.
Begge framlegga fall mot dei to røystene til Norddalslista.

Handsaminga
Dei 13 søknadene vart handsama kvar for seg. Resultatet av løyvingane følgjer her:
Christine Winge Strandmann som driv Bhoga Yoga, søkte om 51.000 kroner til vidareutvikling av verksemda. Innstillinga var på 25.000 kroner. Senterpartiet gjorde framlegg om å redusere beløpet til 10.000 kroner, mellom anna fordi ho har fått 20.000 kroner i delegert støtte før. Vedtaket vart fatta med 4 mot 3 røyster.

Valldal Maskinlag søkte om 53.500 kroner til innkjøp av ei transportvogn for dyr.
Rådmannen avviste søknaden fordi tiltaket ikkje ligg innafor føremålet til næringsfondet. Fondsstyret vedtok denne innstillinga samrøystes.
Håkon Myklebust (Sp) som er med og betalar i vogna, vart funnen ugild i handsaminga av denne saka.

Berdal gartneri søkte om 268.000 kroner til investeringar i eit biobrenselanlegg.
Rådmannen foreslo å løyve 150.000 kroner til gartneriet som har spesialisert seg på agurk- og julestjerneproduksjon. Tverrpolitisk liste foreslo å redusere løyvinga til 80.000 kroner, men fleirtalet i fondsstyret vedtok løyvinga på 150.000 kroner.

Nils Grønningsæter søkte om 62.000 kroner til kjøp av mjølkekvote. Næringsfondsstyret slutta seg til innstillinga som sa at slikt kjøp ikkje kjem inn under fondsføremålet.

The Happy End Norddal søkte om å få dekt eit underskot på 13.500 kroner etter Midtsommardagar 2009. Rådmannen meinte at tiltaket ikkje kjem under fondsføremålet og fekk med seg fondsstyret på det.
Fondsstyret var ikkje uviljug til å støtte organisasjonen, men meinte at søknader må kome i forkant av arrangement og viste til fellespotten “Sommar Norddal” som kommunen vil opprette.

Jordbærstova søkte om 100.000 kroner til å rehabilitete gamlehuset på garden slik at dei kan tilby overnatting i tre dobbelrom med høg standard. Audun Skjervøy (Nl) gjekk frå som ugild, sidan han er underleverandør til verksemda.
Rådmannen tilrådde eit tilskot på 50.000 kroner for vidareutviklinga. Tverrpolitisk viste til tidlegare løyvingar og tilrådde ein reduksjon på 25.000 kroner. Næringsfondsstyret delte seg i to, men dobbelrøysta til ordføraren sørgde for at Jordbærstova fekk 50.000 kroner.

Juvet landskapshotell har tidlegare fått 400.000 kroner i tilskot som den gongen var full pott. Sidan maksimalt tilskot er utvida til 600.000 kroner søkte Knut Slinning om ei tilleggsløyving på 200.000 kroner og viste til totalkostnaden på prosjektet har auka frå 15 til 20 millionar kroner.
Rådmannen frårådde å innvilge søknaden fordi kommunen har mange søknader som skal tildelast tilskotsmidlar innafor budsjettramma. Det fekk han med seg eit samrøystes fondsstyre på, sjølv om ordføraren gjerne ville ha løyvt meir.

Landbruk Nordvest søkte om 150.000 kroner til eit prosjekt der dei utdannar utanlandske avløysarar og landbruksvikarar. Rådmannen tilrådde eit tilskot på 110.000 kroner som fondsstyret samrøystes velsigna.

Tafjord Båthamn og Camping søkte om 140.00 kroner til renovering av kjøkken og toalett, leikeplass, innkjøp av to båtar og to hytter. Rådmannen tilrådde ei løyving på 40.000 kroner til hytter og leikeplass. Renovering blir sett på som vanleg vedlikehald og båtane er alt innkjøpte.
Næringsfondet vedtok innstillinga samrøystes.

Fjørå Kai søkte om 175.000 kroner til reparasjon av kaihuset og kaia. Rådmannen frårådde å løyve midlar sidan slike tiltak verken er prioriterte i vedtekter eller retningsliner for fondet. Utvikling Fjørå som byggjer småbåthamn, har tidlegare fått 400.000 kroner frå næringsfondet.
Innstillinga vart samrøystes vedteken.

Ytterdal Camping søkte om 200.000 kroner til kjøkken, serveringslokale og opphaldsrom for gjester i fjøsen. Rådmannen tilrådde ei løyving på 50.000 kroner, som næringsfondsstyret samrøystes slutta seg til.

Hilde og Jan Olav Hesthaug søkte om ei tilleggsløyving på 370.000 kroner for kombinasjonsbygget som inneheld husvære og serveringslokale. Rådmannen viste til tidlegare løyving på 230.000 kroner og avviste søknaden. Det slutta næringsfondsstyret seg til og viste til same praksis for Juvet landskapshotell.

Rempro søkte om 400.000 kroner i samband med at verksemda utviklar eit nytt produkt til oppdrettsføremål. Rådmannen rådde til at Rempro skulle få 200.000 kroner. Det fekk han med seg eit samrøystes næringsfondsstyre på.
Rempro har tidlegare fått ei løyving på 200.000 kroner til oppstart av verksemda.