Ti husstandar utan vatn
Måndag ettermiddag fekk Stordal vasslag melding om at vatnet var borte hos mange husstandar.

7. januar 2010
Britt Ingunn Maurstad

Opptining av skaden og utbetring av skaden. Foto: John Kristian Hjelle
Mellom anna vart barnehagen ramma, og grendasalen vart teken i bruk som barnehagelokale tysdag.
Sjølv om dei aller fleste, barnehagen medrekna, fekk att vatnet i løpet av tysdagen, var det onsdag framleis omkring ti husstandar i Hovslia som ikkje hadde vatn.
– Det er sprukke eit rør på ein avstikkar til hovudvassleidninga i nærleiken av barnehagen, seier leiar av Stordal vasslag, Svein Roar Tafjord.
Heilt sidan dei lokaliserte brotstaden i går ettermiddag, har staden stått på tining ved at dei har lagt varmekablar oppå bakken.
Tafjord reknar med at grunnen tinte såpass onsdag ettermiddag at dei kunne byrje med å grave seg ned til brotstaden og få skifta rør. Han vona at alle fekk att vatnet onsdag kveld.