Vårkonsert med korpset
Litt optimistisk, kanskje, å tru at våren for alvor er komen allereie første helga i mars, men Eidsdal Musikkorps valde likevel å leggje den årlege vårkonserten til 7. mars.

11. mars 2010
Britt Ingunn Maurstad

Eidsdal musikkorps kom rett frå Norvestmeisterskapen på Nordfjordeid der dei tok ein tredjeplass.

Det passa liksom så godt å ta den i tilknyting til deltakinga i Nordvestmesterskapen på Nordfjordeid. Korpset vart nummer tre i klassa generasjonskorps, og dirigent Jan Helge Andreassen synest dette er ein god prestasjon.
– Dei fleste andre generasjonskorpsa har flest vaksne og nokre få ungar. I dette korpset er det omvendt: Vi har flest ungar og berre nokre få vaksne, sa han.

Stort publikum
Som vanleg var det mykje folk som i tillegg til å høyre korpset spele, også kom for kaffi, kaker, åresal og utlodning.
Korpset spelte fleire nummer, mellom anna eit stykke eg aldri har høyrt i korpsversjon før, David Bowie sin ”Life on Mars”. Spesielt.
Etter konserten vart dei nye førsteårsaspirantane presenterte, så mange som ti i talet. Slik sett har korpset det ”problemet” at det stadig veks, slik at det ikkje er uniformar til alle, og snart ikkje instrument til alle heller.
– Det skal bli ein interessant 17. mai med tanke på uniformar, sa leiar Anne Kari Ytterdal.

Årsmedaljar
Det vart også delt ut medaljar til dei som hadde vore i korpset i høvesvis tre, fem og sju år. I tillegg har korpset eit aldri så lite jubileum i år. 1. januar 1975 vart det registrert hos Norges Musikkforbund. Derfor blir det 35-årskonsert til hausten. I tillegg ser det ut til å bli korpstur til sommaren.