Steinras ved Rønnebergjuvet
Ein våt haust og rekordkald vinter har gjort at når det no lir mot vår kjem ned stein mange stader. I går vart eine køyrefeltet på veg opp frå Eidsdal sperra på grunn av steinras.

8. april 2010
Britt Ingunn Maurstad

Vegvesenet vil ikkje opne begge køyrefelta på vegen i Eidsdal før sikringsarbeida er ferdige.
Dei lokale folka frå Mesta som sperra deler av vegen, syntes det såg stygt ut på rasstaden. Det same gjorde ein del av bygdefolket som hadde køyrt forbi på veg heim frå arbeid.
Kjell Haukeberg i Statens vegvesen seier seg einig i at det ser stygt ut på staden, og i går ettermiddag var der ein geolog for å vurdere fjellet og korleis ein best skal sikre staden mot nye ras.

Bolting
Strakstiltaket blir å bolte steinblokka som framleis heng der fast i fjellet i bakkant. Først då kan ein reinske ned det som framleis er laust.
– Vil køyrefeltet bli opna att med det første?
– Nei, av omsyn til tryggleiken vil køyrefeltet vere sperra til vi er ferdige med å bolte fast den blokka som er att. Vi er allereie i gang med å få inn nokon som kan gjere dette arbeidet for oss, seier Haukeberg.
Om det blir naudsynt med ei meir permanent sikring, tar dei stilling til seinare, men han utelukker ikkje at det etter kvart blir sett opp ein støttemur for å halde fjellet på plass. Dei vegfarande gjennom Eidsdal får altså berre leve med innsnevringa av vegen ei tid framover.