Midtsommardag med ny vri

Camp Norddal er friluftscampen for ungdom under årets Midtsommardagar, ein nyskaping som arrangøren har fått til i samarbeid med ungdomsrådet i kommunen.

10. juni 2010
Britt Ingunn Maurstad

Elevane på mellomsteget ved Eidsdal skule samla utanfor sin installasjon. Til stades var òg lærar Merete Løvoll Rønneberg og rektor Karl André Birkhol.
Utpå våren vart ungdomsrådet kontakta av arrangøren av årets Midtsommardagar med spørsmål om dei kunne tenkje seg å vere med på å lage eit aktivitetstilbod også for ungdom.
– Sjølvsagt ville vi det, for midtsommararrangementet har vore ganske kjedeleg for oss, seier leiar av ungdomsrådet Astrid Nerhus Dale.

Arbeidsgruppe
Det vart nedsett ei arbeidsgruppe med dei i ungdomsrådet som er frå Norddal, med Kari Elisabet Løvoll Dalhus som representant frå Midtsommardagar.
– Samarbeidet har fungert godt, og eg trur vi har funne fram til aktivitetar som folk har lyst til å prøve, seier Astrid.
Ungdomane la vekt på at det skulle vere friluftsaktivitetar, og under Midtsommardagane vert det høve til å prøve seg på mellom anna klatring og kajakkpadling. I tillegg vert det lagt opp til at campen skal ha ein sosial funksjon der folk kan bli kjende, slik at det blir både felles grilling og felles frukost for deltakarane.

To dagar
Aktivitetane går over to dagar, og det er høve til å overnatte i lavvo og telt for dei som ønskjer det. Både når det gjeld klatreaktivitetane og padlinga, så har dei knytt til seg folk til å hjelpe seg. Lokale instruktørar til klatringa har dei fått tak i. I tillegg stiller Friluftsrådet med utstyr og instruktørar til kajakkpadlinga.
– Kva synest du om spørsmålet frå Midtsommardagar?
– Det har vore heilt perfekt å få vere med på dette. Det er jo nettopp dette ungdomsrådet er til for, å skape aktivitetar for vår aldersgruppe, seier ho.
Av omsyn til den vidare planlegginga av friluftscampen, er påmeldingsfristen sett til måndag 14. juni.
– Vert aktivitetane avvikla uansett vêr?
– Det vil dei. Du veit, det finst ikkje dårleg vêr, berre dårlege klede. Eg trur det blir bra uansett, men vi håper sjølvsagt på knallvêr og mange påmelde, avsluttar ho.