Stordalscup i strålande vêr – som vanleg
Vêrmeldingane varsla regn til stordalscup-helga langt ut i veka før, men då helga endeleg kom vart det ”Stordalscup-vêr” med årets finaste dag så langt på laurdagen.

8. juli 2010
John Kristian Hjelle

Hedda Helland i duell med ein motstandar i kvitt i klassa J08. Dei to andre stordalsjentene som følgjer på, er Lone Lorgen Øvrebust og Herdis Kamp. Adrian Nakken var kampleiar.
Stordalscup kunne i år feire sitt 30 år med 94 lag i klassane frå 7 til 16. I tillegg til fotballkampane, som gjekk frå tidleg laurdag morgon til ut på søndag ettermiddag, var det fredag kveld karnevalstog og musikkmønstring med lokale aktørar, A-lags kamp, ”cheerleading” og gratis konsert med dei lokale gruppene Lady Writers og Child’s Play.

Nok å fylle tida med
Tivoli, loppemarknad, sals- og utstillingsmesse, lotteri, grill, kiosk og andre ulike aktivitetar og underhaldning gjekk parallelt med kampane gjennom helga, så for dei mange unge spelarane og publikum var det ikkje noko problem å finne noko å fylle tida med i pausane mellom kampane.

Ny stablerekord
Av aktivitetar ein kunne prøve seg på var mellom anna å skyte med pil og boge, få målt med laser kor hardt ein skyt ballen, skyte med ball mot blink, minigolf, paintballbane og bruskassestabling. Kristian Henden Dahl sette i år ny stablerekord for Stordalscup med 24 kasser.
Dansegruppa ”Vestnorge” stod for musikken for mellom 700 og 800 danseglade på utedansen laurdagskvelden, ein dans som vart greit avvikla og gjekk føre seg i fredelege former.Søndag stilte Jonathan Parr opp på stadion og dømde nokre kampar. Han vart intervjua der også, og dei unge kunne stille han spørsmål som han svarte på.

Barneaktivitetsveka
Stordalscupen markerte slutten på barneaktivitetane som prega Stordal heile førre veke. Det byrja søndag med aktivitetsdag på Ytste-Skotet, følgd av familiefest på kaia på Dyrkorn, der det var underhaldning, fiskekonkurranse og sal av mat og drikke.
Måndag var det miniatyrskyting på skytebana i Stordalshallen for dei frå 5. klasse og eldre, og om kvelden kunne borna møte Jonathan Parr i grenda-salen der han vart intervjua og fortalde om kva som har vore viktig for han i arbeidet med å nå måla sine som fotballspelar.
Tysdag var det ”Moro med friluftsrådet” med ulike ”vikingleikar” i tillegg til laksefiske i Stordalselva. Den største opplevinga fekk nok Mathilde Vinje Øvrebust, som drog i land ein laks på nesten seks kilo.
Onsdag fekk den som ville, prøve seg på vannski, og torsdag var det ballspel og friidrett på Kirkebø stadion. Om kvelden var det som ein del av Kyrkjehola kulturbeite familiekonsert med perkusjonisten Kenneth Ekornes i Prestestova Fredag var det karnevalstog frå sentrum og til Kirkebø stadion, der det i kombinasjon med andre aktivitetar og som ein del av opninga av Stordalscup var song frå mange dyktige stordalstalent som hadde delteke på songseminar med Maria Holand Tøsse gjennom veka.