Frå 1. februar får 56.000 innbyggjarar i fylket over 18 år invitasjon til å delta i ei folkehelseundersøking. Svara som kjem inn skal brukast til å lage både lokale og regionale planar og til å prioritere kva tiltak som må setjast inn for å betre folkehelsa.
Får invitasjon på sms eller epost
I dei nærmaste dagane vil innbyggarar over heile fylket ta i mot ein sms eller e-post om å delta i folkehelseundersøkinga, der også mange i Fjord kommune blir trekt ut. Spørjeskjemaet inneheld spørsmål om kor fornøgd folk er med nærmiljøet og lokale tilbod og aktivitetar, og om eiga helse og livskvalitet, levevanar, skader og ulykker.
– Informasjonen vi får frå innbyggarane våre gjennom undersøkinga vil kunne seie mykje om kva vi skal prioritere i arbeidet vårt for ei berekraftig samfunnsutvikling i kommunen og i Møre og Romsdal, seier folkehelsekoordinator i Fjord kommune, Kristi Linge Stakkestad.
Første gong i Møre og Romsdal
Dette er første gongen det blir gjennomført ei så stor undersøking for å kartlegge befolkninga si helse, trivsel og livskvalitet i fylket.
Deltakarane er eit representativt utval som blir tilfeldig trekt frå Folkeregisteret. Opplysingane blir lagra og behandla i samsvar med gjeldande reglar om personvern.
Viktig med høg svarprosent
Denne undersøkinga er ein del av ei nasjonal satsing i samarbeid med Folkehelseinstituttet, og mange fylke har allereie gjennomført slike undersøkingar i sine fylke.
– Vi ønskjer at flest mogleg av dei som får invitasjon til å delta svarar på undersøkinga. På denne måten kan alle bidra til det blir tatt omsyn til kvardagen, livskvaliteten og meiningane til dei som bur i kommunen vår og til forsking på fylkes- og landsbasis. Resultata vil vere svært viktige for korleis vi legg planar i åra framover, seier folkehelsekoordinatoren.
På Møre og Romsdal fylkeskommune og Folkehelseinstituttet sine nettsider kan du lese meir om undersøkinga:
https://www.fhi.no/div/helseundersokelser/fylkeshelseundersokelser/