Denne påminninga kjem frå kommuneoverlege i Fjord, Henrik Steenfeldt-Foss.
Sjølv om svært mange no er ferdig vaksinerte – og endå fleire har fått første dose med vaksine, minner han om at det ikkje dermed er slik at vi kan gløyme alt av gode vanar vi har lagt oss til det siste halvtanna året.
Vask hendene og hald avstand
– For dei som no er smitta, ser det ut til at dei har så mange nærkontaktar at det ikkje nyttar å drive smittesporing, seier han og minner om at det vi har lært gjennom pandemien, framleis gjeld.
Det er viktig å halde seg heime når ein er sjuk og å kontakte legekontoret for å avtale tid for testing.
Dessutan er det like viktig som før med god handhygiene, altså å vaske hender, og å halde avstand til dei du ikkje bur i lag med.
Kommuneoverlegen ber innstendig folk om å halde fram med desse enkle, men viktige smitteverntiltaka også i tida framover, sjølv dei som er vaksinerte.
Legekontoret
Noko anna kommuneoverlegen ønskjer å oppmode til, er at innbyggjarane i Fjord hjelper legekontoret med å korte ned på ventetida.
– Vi strever for tida med litt lang ventetid på legekontoret. Det skuldas hovudsakleg gjennomføring av sommarferie og covid-situasjonen, seier han.
Innbyggjarane i Fjord kan hjelpe legekontoret ved først og fremst å bruke legetimen ein har fått.
– Og så ber vi folk om å ta opp éi problemstilling om gongen. Er det fleire ting du vil diskutere med fastlegen, så ber vi om at du bestiller ny time, seier han og er oppteken av at legen helst skal bruke tid på det som er viktigast for nettopp deg.
– Saman må vi ta litt ansvar for å korte ned på den litt lange ventetida, og då kan dette vere eit tiltak, seier han og legg til at målet er at pasienten og legen i lag finn ut og prioriterer det som er viktigast for kvar einskild.
Og så er det slik at det som ikkje er så alvorleg må vente litt til fordel for det som hastar og som er alvorleg.
– Og hugs, vi ønskjer alle pasientar velkomne attende til oss, avsluttar kommuneoverlegen.