Bevaringskonsert med Maj Britt Andersen på Severinbrauta – Ei heilt spesiell musikalsk og kulturhistorisk oppleving i hjartet av Eidsdal

Søndag 17. august kl. 16 inviterer Smart Fjord Kultur og Eidsdalsrøre til ei heilt spesiell konsertoppleving på den freda husmannsplassen Severinbrauta i Eidsdal. På scena står sjølvaste Maj Britt Andersen – ein av dei mest folkekjære artistane i norsk musikkhistorie, og vinnar av Spellemannprisens heiderspris 2024. Saman med seg har ho dottera Daniela Reyes, som sjølv har gjort karriere som musikar.

Konserten er ein del av satsinga Bevaringskonsertar, eit nytt konsept utvikla av Smart Fjord Kultur og Stiftinga Geirangerfjorden Verdsarv. Formålet er å kombinere store musikkopplevingar med støtte til vern og restaurering av viktige kulturminne i regionen.

Konsert for kulturarven

Inntektene frå konserten går uavkorta til Stiftinga Severinbrauta, som arbeider med å bevare og formidle den unike historia til den autentiske husmannsplassen frå 1870-talet. Severinbrauta er freda av Riksantikvaren, og omfattar både røykstove, fjøs og låve, samt eit særmerkt kulturlandskap med slåtteeng, frukthage og originalt innbo. Plassen representerer ei sjeldan kjelde til kunnskap om husmannsliv, kvinneliv og kvardagskultur på bygdene.

Konsertarenaen er like unik som artisten sjølv – med utsikt over det vakre kulturlandskapet og med historia i veggane. Publikum får oppleve musikk med djup klangbotn, formidla på ein stad der tid og tradisjonar lever vidare.

Ei artistperle i historiske omgjevnader

Maj Britt Andersen har i over femti år berika både barn og vaksne med si særmerkte stemme, varme og leikenheit. Ho har sett spor i fleire generasjonar med barneplater som Folk er rare! og Ballongvisa, men har òg tolka Alf Prøysen og nyare lyrikk med stor musikalitet og djupne.

Under Spellemannprisen 2024 fekk ho heidersprisen for sitt livslange bidrag til norsk musikk, med juryen si grunngjeving: «Hennar evne til å fornye seg utan å miste sin særegne stemme og varme formidlingsevne, vitnar om ein kunstnar med sjeldan djupne, mot og kunstnarisk integritet.»

No får publikum høve til å oppleve Maj Britt Andersen i nært format, i eit kulturminne som i seg sjølv formidlar det ho står for: verdien av røter, forteljingar, varme og levd liv.

Eit samarbeid for framtida

Bevaringskonserten vert arrangert av Smart Fjord Kultur og Eidsdalsrøre, og er støtta av Sparebanken Møre gjennom samarbeidsavtalen med Verdsarvstiftinga si kultursatsing. Saman tek aktørane ansvar for å bevare kulturarven vår – og samstundes løfte fram nye og minneverdige kulturopplevingar i unike omgjevnader.