2 slåttar vart 30 år!

Ferdafolk med 30 års jubileumskonsert til helga.

Då Knut Ivar Bøe på bakgrunn av CD-en «Ferdamann» (1994) vart hyra til Olsokfestivalen i Valldal 1995, kom det ynskje om å spele eit par slåttar saman med den lokale felespelaren Ingunn Linge Valdal; nyst heimkomen frå utdanning i Rauland.

Det vart straks klart at instrumenta kledde kvarandre svært godt; og med skuffer og skap fulle av gamalt slåttestoff som låg klar og venta på å verte «oppdaga», var programmet plutseleg blitt ein halv time…

Då ein internasjonal trekkspelfestival i Chatres (Normandie) i Frankrike melde interesse eit halvår seinare, vart duoen formalisert, og resten av vinteren brukt til å gjere «storfjordmusikken» i stand for dei store verdsscener.

For Knut Ivar, som for lengst var etablert på plater, radio og TV, arbeid på Teatret Vårt osv., vart arbeidet med å leike fram arrangement til desse feleslåttane likevel noko nytt og spanande; frekke harmoniar og (u)rytmiske innspark bles liv i nedstøva sunnmørsslåttar.

Ferdafolk fekk med sine leikne og humørfylte krumspring ein pangstart; –direktesending frå dansk folk-festival, så Normandie, og seinare turnéar i Danmark same sommar.

Hausten 1996 gjennomførte dei ein kyrkjekonsert-turné langs Storfjorden, og musikken var endeleg komen «heim».

Repertoaret fekk også svenske og shetlandske innslag, pga kontakter KI hadde frå førre plate. Soleis hadde CD-en «Ferdafolk» (1997) plateslepp på Shetland, og fekk ros i utanlandsk presse og hyppig radiospeling.

Andre innspelingar er gjort på Færøyane (2002), nokre spor på «Syngjaren-Folkemusikk frå Møre og Romsdal» (2016), og med koret «Charity» (2017).

Tydelegvis trefte heimlege tonar ein global grunntone; no vart halve verda arbeidsfelt; -frå Shetland, til Finland og Færøyane, representert Noreg ved EBU-festivalar i Hellas (1998) og Ungarn (2001), med direktesend TV til heile Europa; samstundes med ei mengd turnéar for Rikskonsertane, samt hundrevis av hotell/event/næringslivsjobbar i heimfylket.

FF sin rocka versjon av Jens Synnes’ «Synneshallingen» vart ein «hit», og ofte framført saman med dei fremste brass-banda på vestlandet.

Ofte vart ny folkemusikk spesialskriven; som til Cutty Sark (Tall Ships Race i Ålesund), Kyrkjehola Kulturbeite i Stordal, eller t.d. «Trollkyrkjegarden» til Molde Brass og «Jørund Smed» til Ørskog Brass.

FF har siste åra samarbeidd nært med komponist Odd Johan Overøye og Ålesund Kammerkor gjennom «Songen langs fjorden»; seinast med konsertar i «Bergstadens Zir» (Røros) og Vor Frue Kirke (Trondheim, 2025)

I august same år, framførte FF saman med Skodje Kyrkjekor, Magne Fremmerlid, Charlotte Fongen og musikarar ein omskriven og bejubla versjon av «Vindens hjul», (Henning Sommerros folkemusikkmesse) under Fjord Cadenza i Skodje.

Ferdafolk innleiar jubileumsåret med konsert på Ålesund Folk Festival fredag 20. mars!